GOZÊRE

                                                                         

       Merheba. Ez Gozêre ya. Manaya xo kotî ra yêna, nêzana. Merdîmê nê warayî mi ra vanê; Gozêre. Meyweya ke serê gilanê mi de resena ra zî vanê Goze. Kamî mi ronaya, nêno vîrê min. La senîn bêro vîrê min. Kam eşkeno bîyayîşê xo bîyaro vîra xo. Qaso yêno vîra min, ez binê keyeyê Hecî Cebikî de, verê desê bexçî de bîya zergûne. Kemebiyayîya min, Darbîyayîya min û meywe dayîya min weş yêno vîra min. Ez xo zana nêzana Tahar, Hecî Cebik û domananê ey nas kena. Erdêko ez tede zergûn bîya, tira vanê Binê Keyê Musî. Mus kam o, nameyê erdî kotî ra yêno, nêzana. A rastî zî hende zî muhîm nîyo. Yanî merdim ne pê beno derg ne zî kilm. Çi esto ke ez nê keyeyî nas kena û emrê bi înan temaşekerdiş vîyart. Ez zewacê înan, bîyayîşê domananê înan û merdişê înan zana. Hecî Cebik, binê versîya gilanê mi de şi rehmet. Lacanê Hecî Cebikî, tifînganê xo binê qirmê mi de nimitine. Torinanê Hecî Cebikî, pelîstokanê xo çala serê govdeyê mi de wedartine. Waştîyî binê versîya min de çekuyanê xo yê nermikî dîyarîya yewbînan kerdine. Versîya min zehf xeyalê merdiman temarnaye yê.

    Qerarê Şeran zî binê versîya min de ameyî girewtene. Weş yêno vîrê mi, mi peynîya Hecî Cebikî ra gule zî werdo. La, weş yêno vîra min; ê bênamusê Mihî peynîya Hecî ra guleyî rijnayî ke waştine Hecî bikişo. Hecîyî xo eşt pê govdeyê mi ke xelesîya. Weş yêno vîrê min, a roje Xerîba ya xanima Hecî mirdîya xo bermabî. 

    Xerîba timûtim serê bîyayîşê mi ra hesabê xo yê şîyayîşê hecî kerdine. Wesî kerdine domananê xo ke, pê govde û gilanê mi pereyê hecî bidê pê. Vatine; Hecî na dare seba şîyayîşê Hecê min verdaya. Mi pê na dare bişawê Hec. 

    Wextî vîyartî, dem û demserrî qelebîyayî. Ne Xerîba pê rotişê mi, şî Hec ne zî domananê aye, dimayê rehmetkerdişê aye ra mi ra tehmêke werd. Gilê mi bî puçî, awa der û verê min bîye ziwa. domanê domananê Hecî dewe terekna, çend rey mabenê merdiman de şer peyda bi û merdimî merdiman kiştî. 

    Her çî bedelîya, rewşa dewe bedelîya, rewşa keyeyê Hecî Cebikî bedelîya, Xerîba şî rehma homa yê xo ser, Gozêre payîzêko bêtîymet de dimayê şîyayîşê Xerîba bîye puçe û rijîya...