MERGÊ GOZÊRE
Mi mesela daranê derûdorê xo ra goşdarî kerda. Mi bi çimanê xo mesela nêdîyo. Rojêko ez resaya emrê fehmkerdişî, gozêra ke cîranê min a, na mesela mi rê akerde. A rastî rojêka aye na mesela mi rê akerde, ez bi şîyayîş û ameyîşê domananê dewijan zehf keyfweş bîbî ya. A roşe, gozêra cîyanê min, gilê xo hetê mi ya derg kerdî û bi qalkerdişê na mesela mi îqaz kerd.
Gorê qalanê aye, cayêko ez ser o zergûn bîya verî cayê qirmê gozêreke bîyo. A gozêre emrêko derg serê na herre de kerdo, la dima bi destê çend kesan ya ameya birnayîşî û rotişî. Gorê qalan mesela vîst serre verî ra dest pê kena. Ê çaxan xela bîbî ya. Dewijî zî na xela ra barê xo girewto û dewe de veyşanîye dest pê kerda. Dima giranîya xela bîya kêmî, la merdimî hima zî gorê wextanê xela qîymetê estbîyayîşî û çinbîyayîşî zanê, tabî gorê xo!
Ê Çaxan de dewijan qîymet dayêne gozêran. Gozêrî gozan girewtine û merdiman zî nê gozan daxîlê zaxîreyê xo yê zimistanî kerdine. Coka gozêrî biqîymet bî, her kesî gozêrî ronayîne. Hela hela cayêk de kemê gozêrêke xo ver ra zergûn bibo, merdiman keyf kerdine. Leze kerdine derûverê kema gozêre viraştine. Gozêre waye dayîne û kerdine weye.
Payîzêkê ê wextan ra, dewijêke yew gozêra dîyarê qerajî roşaneno. Ti nêvanê xetêka dîyarê qerajî ra dest pê kena û heta warê wareyî yêna ê wextan bi awe pir a. Gozan ra çend gozê ke a dare ra ginayê erd, awe de heta binê qirmê min ameyî. Ê gazan ra zî gozêke nê cayî de bi yew pîjikî der pa manena û vindena. A goze uca de, qederêke manena û qirm dana erd, zergûn bena.
Dewijêko wayîrê nê erdî yo, çend rojan ra dima na keme ferq keno. Gêno derûverê keme verazeno û qateyê gozêre beno. Gozêre uca de vera vera verazêna, bena derge. çend serrî ra dima hinî resena wextê xo yê goze girewtişî. La ne a serre ne zî serranê dimayênan gozan nêgêna. Gozêrê derûverê aye gozan gênî. Wayîrê înan yênê û her serre înan roşanenî. Her serre derûverê ê gozêran şên o, domanî û merdimê girdî yênê binê nê gozêran û xo rê gozan wenî, dima zî gozan kom kenî.
Derûverê gozêranê bînan bi domanan ya pir ê, la versîya a gozêre de tu kes çinî yo. Kes nêno verê aye. coka derêverê aye vaş girê dano û vaşê derûverê aye beno derg û derûverê aye gêno. Dima merdimî seba nê vaşî zî xo dûrê na gozêre danê.
Zehfê wextan zî merdimî derheqê aye de; bêkêr, bêzad, bêhêvî vanî. Nê vatişî zî sey vaşê derûverê aye serê zerra aye gênî. Vera vera aye zî bi vatişanê merdimanê bînan bena qayîl û sey înan fikrêna. Çiqas îqna bena hende çelmesêna, hende xo ra vêrena. Vera vera kewena binê versîya gozêranê bînan û ê dehlan.
Çend serran ra dima ne gozan ne zî pelan gêna. Govdeyê aye ra her tim vengê bermî beno vila. Her wext, tarîyîya şewe de vengê nalayîşê aye berzê asîmanî beno. Wayîrê erdî zî fek qatebîyayîşê aye ra vera dano. Aye bi halê xo verdeno û şino. Gama hetê nê erdî bêro yan nêno verê aye yan zî ameyîşê xo ra pîşman keno. vatiş serê vatişan pa keno. Xeberan vano û nenganê neslê gozêre keno.
Gozêre zêde deyax nêkena û xo ver ra dana. pelanê xo rijnena, awa gilanê xo ancena û qiwetê xo ye hemberê dijwarîya tebîetî vera dana. Gozêre vera vera verê çiman de helêna û bena puçe. Dima wayîrê erdî aye bi motorê daran birneno û sey textan roşeno. Vengê bermayîşê gozêre hima zî her şewe yêno reseno goşanê gozêranê bînan. A gozêre verê çiman de helîya û merde, nika zî cayê aye de ez zergûn bîya.
Nika a dewa dûre de valêra serê qirmê gozêre de zergûn bîya, boya gozêre dana. Merdimêko dimayê textanê daranê gozêran gêrenî, boya valêre girewta û sey gozêre vînenî. Valêre zî na hebe zana û her şewe sey gozêra merdî hêdî hêdî û kûrî ra bermena.
Vengê aye serê dewe de çerexêno, dewe bi vengê aye gumena...
Yorumlar
Yorum Gönder