HEWNO VINDÎBÎYAYE 1

 

Req...

        Hewnê xo de dî ke buriskî da qirmê şiqoqêre ro, şiqoqêre gilanê xo ra verbi qirmê xo werte ra qeleşîya û bî di letî. A reqî de goşê ci çingîyayî. Sereyê ci ra dû bîyine vila. Sereyê ci bibi germên. Sey kila adirî mezgê ci veyşayîne. Tersa, qîja, qîra, bara, veynda. A viste de gilê şiqoqêre ke şikîya serê sereyê ci ro ame. Hima nêgina sereyê ci ro  ceneqîya û hewn ra bi aya...

    Destê ci lerzayîne, tewe girewtebî, xo zereyê cile de pêşa, bi lepêke. Paşta xo da dês. Waşt ke lerazayîş û tersê xo vindarno. Taritîya keyî de nêeşkayîne bi hîsanê xo. Areq dayêne, lerzayîne û xo antine pêser. Çend deqîqeyan ra dima hêdî hêdî nefesê ci bi normal, lerzê ci bi kêmî, tersê ci zî bi vila. Ewnîya derûverê xo ra ke zereyê wedeyî de serê cayê xo de yo. Seke hezar reyan kerdo û bîyo pispor taritîya wedeyî de destê xo dergê serê masaya xo ya verê cayê ci kerde. Qedeha awe bi piçîyanê xo pêşte û ante kinarê masa, xişînîya antişê qedehe tarîya wedeyî dirna. Qedehe ra awe şimite û serê hewnê xo de fikrîya. Hewnê ci sey eynî verê çimanê ey de bi. La çîyêk ferq kerd ke hewnê xo ra çend serebutê muhîmî hêdî hêdî benê vindî. Zor şa xo ke çîyêk xo vîr ra nêkero û her çî bîyaro vîra xo. No cehdê ci çîyêk muhîm ard vîra ey. Hewnê xo de vengê kesêke eşnawitbi û rîyê tersê gilê şiqoqêre no veng vîra ey ra şibi. Veng vengê kamî bi, veng çi vatibi, nêame vîra ey. 

    Waşt ke no veng û wayîrê vengî reyna vîno, vîdeoyanê youtube ra eşnawitbi ke zehf wext nêkewo maben û merdim rakewo eşkeno hewnê xo yê nêmcetî bikero temam. Her çî ca de verda û xo eşt verara cile. Tayê wext ra dima kewt behra hewnan. 

    Hewnê xo de cayêk berz de bi. Warê ê cayî de mangayî çêrayîne. Verê mangayan de lacê apê ci gavantîye kerdine. Dî ke, nika verê ey de yo. Pîya peynîyê mangayan ra şinî. Wext qut bi û xo verê keyeyê kalikê xo de binê elîye de ronişte dî. Pîyê ci behsê roşanayîşê gozêre kerdine. Destê birayê ey yê pîlî de rewte bibî. Wext tewîya û nika serê gilê gozêre de destê ey de rewtêka ey ra ver destê birayê ey de bî esta. Yew di rey rewte şa gozan la reya hîrêyîne de rewte vengayî ro şî, nêeşka xo cayêk wa pê bigîro û serê gozêre ra gina erd ro. O dej de hewn ra bi aya. 

    Reyna lerz, ters û ê çîyî bînî. Gama heşê ci ame sereyê ci, ferq kerd ke hewnê xo vindî kerdo. Reyna xo hîsanê peynîya hewnî ra xelesna û rakewt. La reyna bi serebutê hewnekê bînî de bi aya. Wina wina heta şefeq hewn bi hewn geyra. La ne resa hewnê xo ne zî meraqê xo yê wayîrê vengî mirdî kerd. Peynîye de qenaatê ci ronişt ke hewnê xo vindî kerdo.

    Ê wextan de bi dîyayîşê hewnê şikîyayîşê gilê şiqoqe hewnê merdimekê xerîbî heremîya. Ey ra dima yewêka bîne û yewêko bîn zî bi dîyayîşê nê hewnî bîbî aya. Hinî dîyar bi ke hewnê mêrikî zî bibi vindî û dimayê wayîrê xo bi...