XIRBA GOZÊRAN

             

    Mar kewto seleb, vatine û qîrayîne keynaya pancîyês serrîye. Honkayîya serê sibayî vengê keyna mehlaya dewe ra bi vila. Dûrî ra dewijêke bi traktorê xo şîyine koye, mîyanê erdan. Vengê traktorê qirînîya keyna fetesna. A game de maya keyna, birayê aye yo qic û apê aye resa verê selebî. 

        Selebê keyî kûrîya keyeyî de wedeyêko peynî de bi. Şibaka selebîya tenge û barî nêverdayîne roşnê tijî bireso her cayê selebî. Dês û binê selebî bi çîmento ceble bibi, coka roşnêko resayîne zereyê selebî laşê çîmentoyên de bîyine vindî. Seleb keye ra bi çarşebêka sipî û xayîne abirîyabi. Serê çarşebî de nameyê marqaya ardan meqlubkî û serajêrkî nuşte asayîne. Seleb de yew qazane keske ca giretbi. Verê qazane de satilêko plastîk yê boyaxî 5 kîlo ronaye bi. Awêka mislixa qazane ra herekêna zereyê satilî awa germe kena savugerme. Hetê çarşebî de serê çîmento de cilê keyna ronayebî. Sereşitişî ra dima keyna înan xo ra dayêne. 

    Apê keyna çarşebîya selebî da kişte û ewnîya selebî ra. Buxuro ke seleb ra bîyine vila da rîyê apî ro. Apî, xo tay apey da la reyna bi çimanê xo yê tujkerdeyan ewnîya nata û botayê selebî ra. A viste de çimê ci ginayê cilanê keyna. Wext vindert, keyna şermaya, maye bî mahcup, ap şermaya. Qederêke nêeşkayî biewnîyê yewbînan ra, Heta ke vengê fîrkayîşê marê sîyayî ame. Herkes yew reyde ewnîyayî hetê selebî ra. O wext mar kewt verê çimanê înan. Mar seleb de ê neqebê selebî de. Mar ewnîyeno keyna ra, sereyê xo keno berz. Ap ewnîyeno marî ra û destê xo çuwaya xo ya gopale ser de şedineno. Wina çiqas vîyart nêame hesabkerdene. Deyaxê apî deqîya û apî çuwaya xo verê ra vete da vernîya xo, mabenê keyna û marî. Marî, qîymet nêda apî ke seke werizo serê linganê xo wina bibi berz. Çimanê xo serê keyna ra nêaqitnayîne. Seke xerçê keyna qîymetê çîyêk çinî bi. Mar çiqas berz bîyine, apî zî çuwaya xo hedre kerdine. Hima apî çuwaya xo nêşabi marî, mar fîrka serê keyna û xo ant qula selebî. Uca de verê dêsî de vindert. Seke paweyê peynîya duayê xo bi. Apê keyna hinî nêeşka bi hêrsê xo û bi qîrayîş hêrişê marî kerd. A viste de maya keyna qîja. Ap, bi ters hetê maya keyna ra ewnîya. Dîyayîşê xo ra tersa û şeqezîya. Keyna zî sey marê sîyayî bibî mar û serê selebî de bi lêfan verbi marî şîyine. Her di marî verê qula selebî de resayê pê û lêfîyayî pê. Ap û maye, nêzanayîne se bikerî. Marî tay lêfyayîş ra dima qula selebî ra bî vindî. Hetê xirba gozêran ra şî.

    Serê sibayî dewe de xeberê keyna bibî vila; keyna remaya, kewta dimayê mêrdan. Xora pî zî keye de nîyo. Keyna bêwayîre mende, kewte dimayê sûtan...