Berberê Mi û Deyîrê Kurdkî

     Gorê mi hewce keno ke ez sere de derheqê porê xo tay qalê zerrtenikîya xo bikerê. Domanîya mi ra nata, merdimanê derûverê mi porê mi begem kerdêne. Derheqê gûr û nermbîyayîşê porê mi pêsnê mi ameyêne dayene. No semed ra bi ke qesnayîşê porê mi seba mi barêko giran bi. Gêra mi berberê xo gorê çend qeysan weçinayîne. Nînan ra yew; weşqesnayîşê porî, di; qîymetê porê mi zanayiş û hîrê zî; gorê waştişê mi qesnayiş. Seba nê qirîteran ez zehf şîya û ameya, La bi di serrî ke mi xo de qirîterêko newe kifş kerd; Berber de xo rehet hîskerdiş. Şima eşkenê nê çîyan ra fehm bikerê ke ez çend psîkopat a. 

    Bi pêşnîyazanê çend embazan ez şîya verê berberêke. Beno ke şima mezîyetê ey bipersê? Mixabin ez nêeşkena hende bi teferruat behsê mezîyetanê ey bikerê, beno ke o zî nê nuşteyî biwano :) Esto di serrî ez verê nê camêrdî de porê xo qesnena. Gama ez şina dikanê ey seke ez game erzena serê hera dewa xo.  Ez verê keyê maya xo de geyrena. Boya selebîya binê boya sabunî de menda yêna zinca mi. Dûrî ra ez ewnîyena mehşêla serê venerê ra. Binê keyî ra ez kena war şina binê gozêre. Uca de domanê dewe seba gozan pêkewenê. Dima, pê gozanê komkerdeyan helawî virazenê.

    Welhasilê kelam dikan gorê zerra mi vecîyabi. Çîyo bîn zî wayîrê berberî merdimêko nihûrmet o. Merdim ke şino verê dikanî, cuwamêrd yêno vernîya ey. Hurmet mojneno. Dima ti ronişênê serê kursîya berberî qiseykerdişê kurdkî boya to akeno. Dima hoparloranê dikanî ra kilamê kurdkî ver bi ver abenê. Yew qedêna; hima tehmê kilame ezmikê to ra nêbena ziwa, kilamêka newî to gêna baskanê xo û bena. Ez ge serê venêre ra engure wena ge zî wextê hela dewarî de binê versîya benêre de vezelnayîya. 

    Ez zana zehf bena derge, la hewce keno ke ez taybetîya mesela weş bîyarê ziwan. Eleqeyê mi û dikan û berberî wina herêkîya, di serrîyê ma bî temam. Ewro zî ez reyna keye ra vecîyaya, verbi dikanê berberî şîya, dikan zereyê pasajêke de yo. Ez verê daranê aqasya ra vîyarta kewta dikanê berberî. Sey her wextî reyna hurmetê merdimê rîyê mi kerd şên. Ca mot mi û ez serê yew kursîya berberî de ronişta. Ez tay eyne de xo ra ewnîyaya; gelo ez hende kewta, hende verbi kokimîye şîya! 

    Mêrikê to verê yew meymanê xo de bi, qaso mi fehm kerd; karê meymanî kewto hetê ci, o zî hetkarîya ey keno ke lacê ey dekero karêke. Meymanan xatir waşt û weriştî. Berberî, înan der heta teber şi û waştişê xatir û oxirî ra dima ageyra verê mi. Gama ageyra ame verê mi, xebatkaranê ey yê xortî vengê deyîran akerd. Ti vanê qey mozart o û ez destxetê vernîya ey ya. Bê muzîk zî nêbetêno. Homa kerd ke muzîk îcad bîyo.

  Qeydê vengê deyîran zereyê dikanê dewesna. Ez û we ma dest pê karê xo yê rutinî kerd. Seba ke ez bîleyê sazkerdişê rutînî bîya verî wendişê deyîre balê mi nêant. La gama berberî makîne girewt xodest, ez xo erqelîyaya ke deyîrê dikanî bedelîyayê. Deyîrê dikanî rayîrê dewe ro mi anêkenê. Erê tay boya wendişê mi yê unîversîte anê heşê mi la hêvîyê mi kewtê awe. No dikan de çîyo winayên qetîyen qedexe bi. Kesan çîyo winasî nêdîbi. No dikan ke ma her dem serê deyîran ra pesnê camêrdî dayêne, la camêrdê to xêza xo bedêlnaya û deyîrê xo serûbin kerdê. Rîyê mi kewt, ez zerrî ra dikan û berberî ra kewta dûrî. Mi waşt ke berber bi makîneyê xo erdîş û porê mi verde mi zî biqesno û nê dikanî ra pak bikero. Erdlerzêko xidar peyda bibo û tewê kursî mi zî bigîro vereka xo, ez vindî biba. Ez hende şeqezîyaya û kewta xover ke qet meperse.  

    Teyîb ra vera deyîranê kurdkîyan deyîrê tirkî akerde bî û deyîrê tirkî qedêna yewna deyîrêka tirkî dest pê kerdine. Ez ecêban de menda. Gelo, se beno. Berberê mi rê se bîyo. Çi ra çîyanê winayênan keno? Nê persê heşê mi de erdlerz peyda kenê. Ez kena biteqa û dikan binê teqayîşê xo de verdê. 

    Çend rey ame serê ziwanê mi ke ez sebebê na bombalate pers bikerê. Hewceyîya na rîsîyayî çi bî? La mi kerd nêkerd ez nêeşkaya bîyarê ziwan. Verî mi waşt ez texmîn bikerê; hela se bîyo. Gelo yewî şîkayetê nê merdimî kerd ke dikanê xo de deyîranê kurdkîyan akeno. Yan zî profîlê muşterîyanê ey bedêlîyayo û o zî seba na hebe deyîranê xo vurêneno; O xayîno pîçxane kam o ke nêno nê dikanî û ma deyîranê kurdkî ra mehrum verdeno, rîyê ey ra kesê bînî yênê dikan, ma serûbin kenê... La ez tay fikrîyaya ke çîyo winayên zehf mumkun nîyo. Xora mêrikî deyîranê polîtikan anêkerdine, zehfêrî deyîrê kulturî akerdine. Muşterîyê ke ez nas kena, hima zî yênê nê berberî. Na teorîya mi zî kewte. 

    Fikrê mi yo peyên polîtîk o. Mi pê megîrê ez rasterast kewena polîtîka. Nêbo nêbo, berberê ma qerar bigîro û sey partîye bibo tirkîyayij. Gorê nê qerarê xo zî deyîranê tirkîyan zî dekerdo repartuarê teyîbê xo. Bibo nêbo na teorî dahîna kewte heşê mi. Beno ke berberê ma zî gorê zerra xo qerar bigîro. La kamî rê çi! Dikan dikanê ey yo. 

    Ez bi nê teorî û fikran heşê xo wena. Canê mi xo weno la persêka ez bipersê nêşeqetêna serê ziwanê mi. Ez rîyê xo kena tirş ke o sebebê na hebe biperso û ez zî ey bitepişê. La ney ey zî xo nayo serê bêvengî. Ez eyne ra çim erzena ey, la qet xemê ey de nîyo. Belbî fehm kerdo nîyata mi û şermanê xo ra nêwazeno eybanê eşkera bikero!

    De de de! mi zor şa xo ke ez cayêk ra xo biteqnê. Ez ewnîyaya xeberêka newî ameye serê ziwanê mi: Mamoste, dibêjin dibe ku Selehattîn derkewe. Ti çi dibêjî? Verî fehm nêkerd, yan zî xo ant nezanî, nêzana. Dima, ciwabê mi da: Ê berdin berdin. Ma mecburin ku berdin. A rastî nav me da jî kesêk henên ku derketina wî naxwazin. Belkî jî dewlet ji kuştina Selahatîn ditirse, jibo vîya wî dernaxe. Belkî wî diparêzin. 

    Haylooo. Mi waşt ez mêrikî de nîyeta ey vecê, mêrik şorbaya vizêrîne têdano. Ciwabêko xas nêdano destanê mi. Zereyê behrê persan de hetê mi nêkeno. 

    Qiseykerdişê ma de deyîrêka tirkî ra dima deyîrêka kurmancî dest pê kerde. Ez kewta xayleyan. Makîneyê berberî zî rîyê mi ra muyanê erdişa mi pak kerdine. Vengê makîneyî de ez xo ra şîya. Fikr û terorîyê mi zî sey muyanê erdişa mi ameyêne war û serê lawaboya berberî de helîyayîne, bîyîne vindî.