MERGÊ DI BORANAN

    

 Domanîya xo ra heta nika, bi qalîkerdişanê cinîyanê qehremanan bibî pîle. Ez pîle vana, la gorê endamanê welatanê bînan hima domane ameyîne hesabnayene. Eke welatêkê bîyanî ra bibayîne, do hima bişîne dibistane. Tena sereyê xo nêeşko şêro banka ra serê nameyê xo hesab abikero. Yan zî bê pîlanê xo nêeşko sukêke ra şêro suka bîne. 

    Awa welatê aye nêmanayîne awa welatanê bînan. Tîya de awe merdimî nêkena bitir la hetê berpirsîyarî ra barê heran dana serê paştîya merdimî. Na ra bi ke aye zî bi nê emrê xo yê domanîye de barêko giran dabi serê paştîya xo. Wa, şaş fehm nêbo no baro giran nika parê aye nêkewt. Gama sereyê domanîya xo de bî, derûverê aye de şer dest pê kerdibi. Welatê aye bi sifreyê sîyayî ameyêne temernayene. Seke binê nê sifreyê sîyayî ra tû xirabîya dest û rî şiteyan nêasano, werteyê welatî ra binê sifreyê sîyayî ra layêko gonên herekîyayîne. 

    Şew û roj qalê nê layî bîyameyêne kerdine zî ne welatê girdan ne zî welatê fekgonînan ra vengêko zelal û pak nêvecîyayîne. Xora welatanê fekgonînan sifreyê sîyayî dahîne zexm pêgirewtine ke nêwaştine vaye zî bido binê sifreyî ro. Gama sifre bêhemdê xo pêsero kom bîyine nê welatan balê merdiman dinya antine cayêko bîn.

    Binê nê sifreyê sîyayî de domanîya xo kerdebî. Domanîya aye kilm amebî nuştene. Demê domanîya aye û emrê aye têdima nêşîne. Emrê aye qic bi la domanîya aye qedîyabî. Binê taritîya sifreyê sîyayî de tifîngêk eştbi milê xo. Her kû wextê xo ameyîne guleyanê xo şanayîne sifreyê sîyayî û cehd kerdine ke vera gulayanê tifîngê aye ra roşnê rojî bido serê rîyê welatê aye ro. Her ke guleyê aye sifre qule kerdine, bi destê pîrehêtanê derûverî cayê guleyanê aye ameyêne pînekerdene û rayîrê roşnê rojî ameyîne qefelnayene. Nê pîrehûtî şew û roj ameyîne derûverê aye de geyrayîne û reyayê pîneyanê sifreyê sîyayî ra gonîya aye û hemwelatîyanê aye şimitine. Hende mîyanê gonî, versîya sifreyê sîyayî û êrişê pîrehûtan de mendebî ke aye de taqet nêmendibi. 

    Nê rojî zî sey ê rojan bî, xebere amebî resabî aye zî, pîrehûtan waştine sifreyê sîyayî bikerê hîra û gonîya merdimanê xelasnayîyan zî bişimî. Na xebera ke ameyî resaye aye, bêîtîraz sey berpirsîyarîya barê paştîya xo guleyê tifîngê xo dekerdî û şîye kewte mewzîyê xo. Zehf wext nêvîyart ke, xo ra pîrehûtî nêeşkenê zehf vinderê- zanê ke çiqas vinderê qicê hewt birayan eşkeno bireso înan û înan bikişo- êrişê herra aye, laşê aye, rihê aye kenê. Êrîşê pîrehûtan hewteyêk rameno. Mîyanê nê hewteyî de derûverê aye ra layê gonîya sûre herekênî. Aye zî zanena ke rojêke aye zî do nê layî de asnawî bikero. Tena wext lazim bi aye rê. Heta ke wextê aye bêro zî verê şerê xo de xeyalê domanîya xo zî ardine vîrê xo. Maya aye ya werteyê taxe de merdebî û hewteyêk meyîtê aye serê rayîrê taxe de mendibi aye ra tim qalê cinîya serê zinarê koyanê welatî ra peraya kerdine. Aye zî na cinî tim sey borana sipîye xeyal kerdine. Serê zinarî de na borane, binê zinarî de zî cinawirê fekgonîn bîyine. cinawirê fekgonînî tim ziwanê borane de qalî kerdine û waştine aye bixapêno û bikero xodest. Boranê bi fêl û xapinayîşanê cinawirê fekgoninî nêxapêna û perena şina serê zerra xoverdayişî. Maya aye tim  bi nameyê na cinîye venga keynaya xo dayêne. Aye zî tim xo vera na borane de dîyine û tim xeyalanê xo de sey a borane perayêne. 

    Bi xoverdayiş û xeyalan hewteyê aye bi temam. Gama versîya sifreyê sîyayî serê laşê aye zî temerna, rewna ra çimê xo na dinya ra kerdibî pak û şibî. Rihê xo serê sifreyê sîyayî ra perayîne û verbi roşnê rojî bîyine berze. Wina ke aye ket nêzana sey cinîya xeyalanê aye rîyê cinawirêkê fekgonênî ra bibî borane û serê mewzîya xo ra perabî...