Qirmê Gozêre

 

  

    Vaye pelê gozêre têşanayêne...

     Xişinîya pelanê gozêre hewnê simoreyî heremnayêne. Simore qula xo de xo geveznayêne, la nêeşkayêne şêro hewna. Vaye her hetê gozêre sehnayêne. Destanê xo her çiqrê gozêre de çarnayêne. Seke dimayê rêça simoreyî bo, gam bi game ver bi qula simoreyî ra ameyêne. Yan zî simore bi nê fikrî qayîl bi. Kerdêne nêkerdêne, nêeşkayêne bi xo. Na rey resabi peynîya raye. Zerra ey ya nêkewena mîyanê di piçîyan kerdêne qafika xo ra bipero teber. Kulpînîya zerra ey goşanê ey kerdêne kerr. Recefê laşê ey, muyê ey yê werişteyî, goşê ey yê vîtî, pawayê wextê mergê ey bî. A linga ke destêke bikewtêne zereyê qule û bi lepê xo qevda milê ey tepiştêne. Sey şurî ey qula ey ra antêne. O zî sey guleyî qula xo ra kerdêne şiqînî û vecîyayêne teber. O wext xelasîya ey çinî bî. 

    Gelo o wext kamî rê lome bîyêne. Kam ke ey dabi dest, gêra lomeyî zî serê ey de bîyameyêne kerdene. Çend serrî yo ke na qula xo de rihê ey serê zerra ey de, kezeba ey fekê ey de ciwîyabi. Her game adaleyê ey şedênaye bî ke bieşkayêne vaz bido û biremo. Her veng de goşê ey bîyêne vîtî û derûverê xo ra ewnîyayêne. 

    Emrê xo bi remayîş û dizdika bo zî xoweykerdiş ra vîyarnabi. Çi bibayêne çiqas dûr bayêne zî rayirêk peyda kerdêne û xo eştêna bextê na gozêre. Gozerê her tim cayê ey yo nimite, wedarte, hewl û ware bî. Zimistanî rakewtêne heta serê wesarî, bêxem bi. Zanayêne ke gozêre ey nêdana dest. Çi rojê ey yê tengî bibî ke xêrê gozêre ra xo xelesnabi. Çi zehmetîyî dîbî ke gozêre ey rê bibî sitare. La nika!

    Hamnan bi pêroyê qewêmîyayîşanê xo sey her serre emrê xo vîyarnayêne. Ware germên bi, to vatêne qey Homayî sey tewqe wareyî dabî serê adirî. Rîyê erdî de vayo tern nêmendibi. Her ca, qasê çim bivîno zerd bi. Tum û giran vaşê xo kerdibi puş. Tena erdê ke bibî hêgayê tutunî şîn kerdêne. Gozêre zî werteyê hêgayê tutunî de derûverê xo akerde, sey zîyara koyan asayêne. Çend metrêyî weta quçêka werdî amebî pêsekerdiş. Qirmê gozêre de çend bismarî amebî çikkerdişî ke seba çaydan û firaqê wayîrê hêgayî bêrê eleqnayişî.  Tutun qasê qama merdimêke bibi derg. Gozî resabî, kankil dekewtibi. Gozî serê gozêre de vera vera bi xo bîyêne qanqof. Gozêka bîyêne qanqof xo vera kewtêne erd. Vengê kewtişê gozan fekê simoreyî ra awe berdêne. Nêeşkayêne bi xo û qula xo ra vecîyayêne û dimayê goze şîyine. 

    A roje zî vaye ra bi yan zî xo bi xo kewtebî nêzana, dimayê vengê kewtişê goze şi. Qula xo ra vecîya. Derûverê qule de çimê xo çarnayî. Verê quçe de domanêko çar panc serre bi herre kay kerdêne. Verî tersa la dima dî ke doman o, çimê ey nêtersayî. Xo domanî ra lezêr dî. Vera vera qirmê gozêre ra kerd war û verbi goze şi. Goze nêzdê quçe de kewtebî. Goze qanqof bibî. Gorê gozanê bînan girde û xurtine asayêne. Çimê ci serê goze de bî, hêdî hêdî xo kaşê goze kerdêne. Balê xo dabi goze. Coka domanî peygoş kerdibi. Qet nêewnîya hetê ey ra. Goze ey rê bese asayêne. Doman karêko asan bi. Heta weriştêne, o resayêne qula xo. Ters zerra ey tereknabi. Bîleyê goza xo bibi. Dinya vîrê ey ra şibî, serê hewran ra gamê xo eştêne. Dinya ey rê xêr xebere bî. Goza xo bigirewtêne, biberdêne, bidayêne serê xizîneya xo ra sitareyê gozêre de nimetîyî ya. Belbî karê xo yê seba nê zimistanî bixelesnayêne. 

    De de de, xo resna goze. Boya goze kewte kokê zinca ey. Diranê ey yê tezeyî zî çiqranê qaşika goze hîs kerdî. Dehwa qedîya bî, sey guleyî gazêke de goze eştêne fekê xo û xo resnayêne qula xo. La o çi bi.... Vengêke goşanê ey kerd pir û çimê ey çîyêke ferq kerd ke serê ey de ameyêne. Seata sereyê xo kerd berz û ewnîya ê hetî ra hinî erey bi. Boxrîyêke( sîyêka lepê merdimî kena pir) ameyî gina serê linga ey ro. Sey mereyî kerde viçînî û rema. Nêeşka bîleyê dejê linga xo bibo. Tena eşkayêne biremo keyeyê xo. Nêzana senîn kerd, la bi hewayêke resa qula xo. Kewt zere û xo da pêser. La teber ra vengê merdimêke û ê domanî ameyêne. Domanî vatêne, tîya yo, tîya. qula ey serê qirmê gozêre de ya. Hadî, ma ey biqefenê û emşo şamî de borî. Gurçika ey mi rê ya ha, va domanî...