Travma

   

 Ez nêeşkena dejanê domanîya xo ra raxelesîyê. Çi wext ez seba cuya xo neqebê gamêka taybete de bi, dejê domanîya mi vernîya mi gêna û mi rê bena asteng. Ez nêeşkana na astengî ra raxelesîyê. Ez ageyrena kamcîn hete travmaya mi yêna verê çimanê mi. Heşê mi tewêno, ziwanê mi beno giran, laşê mi vera vera beno germên, destê mi, qirika mi, binê çenganê mi ra areq sey layê koyan herekêno. Boyêka xirabe yêna zinca min, seke na boye laşê mi ra yêna, ez kewena stress. Seke reyna ezo bikewê xeletîye. Ez hes kena ke her çî pê destanê mi do bixerepîyo. 

    A game, hewesê mi qedêno, fekê mi beno ziwa. Ez nê wextan de bêrîya verarda maya xo kena. Domanîya mi de maya mi, timûtim mi pawitêne, nêverdayêne tersê mi heta peynîya dinya biramo. Mi kerdêne veranda xo û tersê mi bîyêne kemî. Nika maya mi zî dûrê mi de ya. Ez nêeşkena xo biresnê verarda maya xo. Tersê mi nêqedêno. Ez kewena binê hukmê tersê xo. Wext xetemêno. ez xetemêna. 

    Çend wexto ke ez seba na astenganê xo şina terapî. Terapîst yewêko bihêz o. Belbî zî yewêko bi xo bawer o, nêzana. Qiseykerdişanê ma de hende pil qisey keno ke fekê merdim akerde maneno. La tû qiseykerdiş yan zî qalîkerdişê ey nêkeweno verê zerra mi. Bawerîya mi bi hetkarîya ey nêna. Mi rê wina yêno ke, nika ra dîyar beno; ez nêeşkena ser bikewê û na astenganê xo peynîya xo de verdê. 

    ***

Terapîst şino yêno, piçîya xo dano serê yew babete: Travma nêweşîyêka gane ya. Her çiqas ma problemanê xo serê nameyê travma ra pênase bikerê zî her çî nêkeweno verê beryayê travma. Belbî zî seba ke hayeyê ma travma ra esta û ma derheqê travma de zehf hîsdar ê. coka ma her problemanê xo erzenê tewreyê travmaye. Çi bêro sereyê ma, ma bêhesab, bê kirîtîk û bê xoverdayiş probleman sey travma qebul kenê. Hewce keno ke ma travma weş û rast pênase bikerê. Benda xo û sêncê travma lezûlez pênêresnê. 

***

    Nika! no behsê çîye keno. Qey ez nêzana travma û netravma çi ya! Ez ehmeq a? naye, îdîa keno? Mînak zî vano: problem sey dejê birîna laşê merdimî ya. Gama birîne bena başe, dej zî qedêno. Eke ma bieşkê sebat bikerê û problemanê laşê xo mîyanê rastîya dinya de qebul bikerê. Ma bizanê ke peynîye de timûtim nê birînî benê weş, hêtê psîkolojîye ra zî ma zehf zehmetîyan nêancenê. Terapîst wina vano û paweno ke ez zî naye qebul bikerê. Ez verê ey de zehf nêvinderta, wextê mi qedîya û ez verê ey ra vecîyaya, şîya. 

***

    Travmaya ey, her tim kewte verê linganê ey. Nêeşka xo raxelesno. Hêde hêde omidê xo dinya ra birîyayê. Hêzê xo bi sist. Taqetê ey zî nêmendibi. Dejê ey yê domanîya ey, timûtim sey qaruşe binê cuya ey ra vecîyayêne û qirmê ey kerdêne pûç. Teraspîstê xo zî tereknabi. Tena travmaya xo rê wayir vecîyabi. Tim bi travmaya xo der cuyayêne. Rojêk, verê sekuya barî de barmenî der qisey kerdêne. Dejê ey êrişê heşê ey kerdî. Nêverdayêne şimitişê xo ra tehm bigeyro. Sereyê to her di hetan ser o têşana. La bêfeyde bi. Nêeşkayêne dejê heşê xo bikero aşt. Ewnîya ke barmen ewnîyeno rîyê ey ra( rîyê barmenî domanîya ey arde virê ey) dest pê kerd, behsê dejanê xo kerd. Awa bîra reyanê ey ra herekîyabî û îradeyê ey şiknabî. Nêeşkayêne bi fek û ziwanê xo. Çekuyî fekê ey ra sey mozan perayêne û mîyanê tarîyîya barî de perayênê. Barmen zî zixt ewnîyayêne fekê ey ra. Dîyar bîyêne ke ey zî heta nika çîyêko winayên temaşe nêkerdibi. Mozî zereyê barî de perayênê û kewtênê goşanê her kesî. Barmên tay vindert û dest pê kerd, va: 

-Na mesala çi wext qewêmîya? 

Mêrikî va: 

- Hima ez pîzeyê maya xo de bîya. 

- To senîn zana na mesela serê to de têsîrêko giran kena? 

- Senîn tesîr nêkena. Quşê mi dirnena. Tim maya mi, pîyê mi û waya mi behsê na mesela kerdêne. Înan zî zanayêne ke ez travmatik a. 

    Barmen matmende ewnîyayêne rîyê ey ra. Mêrikî zî zixt ewnîyayêne rîyê barmenî ra. Nêzana senîn bi ke rîyê barmenî bedêlîya. Barmen kewt vera terapîstî. Bar bedêlîya kewt vera wedeyê terapîstî. 

Qiseykerdişê mêrikî û awa bîra, reyayanê ey de  herekîyayêne.