Veyva Vaşan

 Wesarî şilîye kerdêbî esparê vayanê xo ardibî wareyê welatî. Welat şew û roj binê hukmê şilîye de mendibı ke, her çirika dereyî ra awe bîyêne çir û herekîyayêne. Xetanê awe her cayî kerdêne gane. Her ca ra boyê vaşan bîyêne berz û bîyêne vila. Sîyayîya herre bibî vindî. Rîyê erdî seke bêro boyaxkerdene şîn kerdêne. Darî zî na şînayî ra para xo wedartine. Verî, gilanê huşkan zîl da, dima zîlan xo akerd û bî pelî. Mîyanê pelan ra vilîkan sereyê xo hêdî hêdî vetêne. Tayê wext ra dima darê huşk û pûçî sey zîyara omidê welatêke pistinê xo de bar kena xemilîyayî. Her hetî wareyî de xemilîyê sûrî, zerdî, sipeyî, pembe û binevşî bi boyanê xo moz û zerqetikan kerdêne serxoş û dewrê xo de cezbê moz û zerqetikan dayêne kerdene. 

    Serê herre wareyî de tewir bi tewir vaşî zî rîyê erdî dirnabî û sere wedartibî. Pelanê xo sey destan asîmanî reyde akerdêbî. Vaya wesarî înan têşanayêne û boya înan kerdêne vila. Wina bîyêne ke mêşê hengemênanî ke hima zereyê texteyanê xo de hepsî bî hêrsan ra texteyanê hepsê xo kuwayêne. Kuwayêne, la reyna zî nêeşkayêne xo biresnê çimeyê boya tezî. 

    Wesar bi her tewir şênayîya xo, xo mocnayêne. Dinyaya merdî newe ra ageyrabî cuye. Na cuya xo ya newîye zî bi xemilnayîş pîroz kerdêne. Tayê wext ra dima, sîneyê nê koyan bi merdiman ya bîyêne pir. Heta ke merdimî bîyameyêne, sineyê verojê koyan de vaşê tezeyî bi xurtîya xo paweyê nan bîyêne. Kengerî, ribêsî, tarî, pirparî, lexendurî, şiqarî(gezî), Xerdel, tolikî, pîvokî ûsn tewir bi tewir vaşî paweyê meymananê xo bîyêne. 

    Ê wextan sîneyê koyan sey veyvan xemilîyayêne. Meymanî bi deyîranê xo yê barê hezar serrê cuya nê waran xo de hewênayêne veyve kerdêne weşe. Vaşî zî ewirê veyvan bî. Meymanî her ca de dimayê nê vaşan gêrayêne. Bi dîyayîşê înan keyfweş bîyêne. Înan kerdêne verarda xo, ge-ge hende keyfweş bîyêne ke çepikan dayêne piro. Deyîran kerdêne dîyarîya nê vaşan. To dî, wet ra yêwî vengê xo yo zelal kerd berz û deyîra "Pîvoka zozana, dişêbe çîruskek asmînan" vatêne. Yewê bînî deyîrêka bîne ardine ziwan. Heta yere veyva vaşan ramitêne û şîyêne. Şanînan zî binê banan de şewa xeberoşkan(estanekan) de serê nê veyvan de tewir bi tewir qalî ameyêne vatene. Ê şewan de domanî tim tersayêne ke serê sibayî vewra sûre bivaro...